Friday, February 14, 2014

නංගියේ සිත් තුටින් නිවනින්ම සැනසියං..

රුපියල් සතවලින් 
හැමදේම මැනෙනකොට
අසරණකම ඉකිබිඳින්නට ඇති
ඇගේ අහිංසක පුංචි ඇස් යට..
මනුස්සකම පලාගිහින්
පෑළදොර අඩවල් නොකරම..

නංගියේ..
සෙරෙප්පු පතුරක් නිසා..
රිදුනු උඹෙ පුංචි හිත..
ගත්ත ඒ තීරණය
රිද්දුවා ලෝකයම..
දාස් ගණනින් ගෙවා 
පතුල් සරසන උන්ට
නොපෙනුණේ ඇයි උඹේ 
අහිංසක හිනා පොද?
ඔය පුංචි හිනා මල..
ලෝකෙටම නැති උනත්..
යළි එපා පිබිදෙන්න 
මේ ජරා ලෝකෙනං! 
නිරාමිස සැප ලබං
නිවී සතුටිං ඉඳිං
නංගියේ සිත් තුටින්
නිවනින්ම සැනසියං!

Tuesday, February 4, 2014

සිහ රජිඳුනේ වැජඹෙනු තෙද අභිමානෙන්! 
























සිංහ කේසාරවය නගමින්
ගෙන තියුණු කගපතක් සුරතින්
රුපුන් එඩි බල කපා හෙළමින්
නැගී ඉනු සිහ රජිඳ යහතින්!

හෙළ බිම අහස සමුදුර එක සේ රකිමින්
ගුවනත නැගී ලෙළදෙන ඔබගේ නාමෙන්
දහසක් මල් පිපෙනු ඇත අද අභිමානෙන්
පැරදෙයි ලොවම මතු දින ඒ අනුභාවෙන් !

ජන්මය ලදිමි මේ පින්සරු ලක් පොළොවේ
රුහිරෙන් පුදා හෝ රැකගන්නෙමි පණ සේ
මියෙනා තුරුම සැනසෙමි සෙවනෙහි ඇයගේ
මියගිය දිනෙක පස් වෙමි මේ බිමට තොසේ !


Wednesday, January 15, 2014

සිතිවිලි!

කවිකම් කෙරුම මෙන් සිතකට සුවය      දෙන
වෙනයම් දෙයක් වෙද මේ ලොව කිසිම   තැන
සිතට නැගෙන කවි සිතිවිලි පදට            ගෙන
කවියක් කර ලියමි සැනසුම ලබා            ගෙන

අයා දෙනෙත ලෝකය දැකුමෙහී            රිසින්
පියා සලා යන විහඟෙකුගේ                විලසින්
සොයා නිදහසේ අරුණළු යමි              රහසින්
ලියා තබමි ගමනක ඇරඹුම             මෙලෙසින්

පද ගැට ගසා කරනා විට මම                කවිකම්
සිතිවිලි ගලා එයි බිඳිමින් සීමා                    ඉම්
පන්හිඳ තුළට කවනෙමි ඒ සියළු            හැඟුම්
කඩදහි කෑල්ලක රඳවමි මතක               කුසුම්!