Thursday, December 10, 2015

~~: දෙවියනි මගේ දුක මොහොතක් අහපල්ලා! :~~

අහසට දෑත් දිගු කර තව වැඳපල්ලා
නළලත බිම ගසන් තව තව යැදපල්ලා
රුහිරෙන් පුදා දෙවියන් පිනවාපල්ලා
මියගිය ඇයට සැනසුම ලැබුණද අල්ලාහ්? 

ගල් මුල් වලින් ඇගෙ ගත තළනා විටදි
දිළිසෙන කගපතින් හිස ගසනා විටදි
ඇගෙ මල් කැකුලු පතිවත වනසන  විටදි
දෙවියනි කිමද නොදැනෙන නොපෙනෙන පරිදි? 

මොන දෙවියන්ද රුහිරෙන් පූජා ගන්නේ? 
මොන දෙවියන්ද මරණෙට අනුබල දෙන්නේ? 
මොන දෙවියන්ද හදවත් දුක් අවුලන්නේ? 
දෙවියන් නිසා ඇයි ලේ වගුරාගන්නේ? 

ආගම නමින් ලේ වැගිරිලි නවතල්ලා
දෙවියන් දෙසූ දේ යළි විමසාපල්ලා
යහපත මිසක් නරකෙන් හිත් මුදපල්ලා
දැන් ඇති මරණ බිය දැන්වත් නවතල්ලා! 

අල්ලාහ් දෙවිදුනේ මේ දුක අහපල්ලා
ලේ ගංගා වලට නැවතුම තබපල්ලා
දහම නමින් දෙන දඬුවම් නවතල්ලා
ලොව හැම සතම රැක දෙනු දෙවියනි අල්ලාහ් ! 

දෙවියන් උත්තමයි මනුසත් අපට වඩා
ඔහුගේ දෙසුම යහපත පිණිසමයි සදා
ඒ දෙසු දහම ගනු මැන නිවැරදිව යොදා
ස්වර්ගය වෙත පෙනෙයි මාවත විවර වෙලා. 

ප:ලි: 
මෙය කිසිදු ආගමකටවත්, ආගමික නායකයෙකුටවත් අහේතුක මඩ ගැසීමක් නොවන බවත් ආගම නාමයෙන් සිදුකරනා ලේ වැගිරීම් පිළිබඳ ඇතිවූ සිත් රිදීම ම පමණක් මේ කවිපෙළට හේතු වූ බවත් පවසනු කැමැත්තෙමි. 

:දෙමින්ත ජයසිංහ: 
#සිතිවිල්ලක් #සිතිවිලිසක්මන

Monday, March 30, 2015

නාම මාත්‍රික 'උත්තම' පුරුෂයෝ :)

ඔවුහු ,
පිරිමින් අතරිනුත්
තමන් ' සැබෑ පිරිමින්' යයි කියා සිතා සිටින්නෝ ය.
වදන් මහා තේජස්‍ ය.
අවවාද දීමේ රුසියෝ ය.
අනුන් බස් නොතකයි.
සැමවිටම සර්ව නිරවද්‍ය වන්නෝය.
කෙටියෙන්,
මහා පුරුෂභාවයක් ලොවට පෙන්නාගෙන සිටින්නෝ ය.

නමුත්,
ඒ මහා යුග පුරුෂයන්..
මදුවිතෙහි ගිළුනු කල,
පෙනුමට සොඳට ඇග ලා සිටි
සීහ චර්මය ඔවුනටත් රහසින්
පොළව සිඹිනා බව දකින්නේ
මැදිහත් සිතැත්තෝ ම පමණි.
සීහ චර්මය ආභරණ කරගත් සිවලුන් කැණහිලුන්ගේ සැබෑ සැටි
ඔවුහූ ම බමන මතින් ලොවක් අබියස විදා දක්වාලති.

එනමුත්,
බක වදන් එසේම ය.
'යුග පුරුෂ' බව නොවෙනස් ය.
උන් මහා දාර්ශනික බස් තෙපළති.
සැමවිටම නිවැරදි ය.
"උන් එසේ සිතා සිටිති."
නමුත්,

බෝතලය අභිමුව
පිරිමිකම උගස් තියනා ඔවුහු,
සීහ හම පසෙක තබා
සැබෑ සිවල් ගති ලොවට පෙන්නති.

ලොව ද අනුකම්පාවෙන්
දෑස් දල්වා
ඔවුනගේ විගඩම්
බලමින්
ඉවසීම පුහුණු කරති.

#සිතිවිල්ලක